Дыс (ад слова «дысрэспэкт») ад Ангста зьявіўся як адказ на словы Сяргея Башлыкевіча ў адным зь відэаінтэрвію, дзе ён выказаўся іранічна адносна здольнасьцяў паэта Віталя Рыжкова (ён жа ўласна і заснаваў праект Angst) чытаць рэп. Гэтая аўдыёцытата зьмешчаная на пачатку трэку. У папярэдняй жа сэрыі Башлыкевіч напісаў дыс на адрас іншага рэпэра — Вожыка. Ангст згадвае ў сваім трэку іх абодвух.
«Калі зьявіўся той дыс ад Башлыкевіча Вожыку, я з жарсьцю ўзяўся сачыць за разьвіцьцём падзеяў. Але нічога не адбылося. Гэта як паказаць вам пілётнік крутога сэрыялу, і вы ўжо чакаеце ўвесь сэзон, але аблом: яго ня будзе. Вожык адмаўчаўся. А тут раптам адзін з герояў згадвае вас. Таму я вырашыў працягнуць гэтую гісторыю», — сказаў Ангст у камэнтары для Tuzin.fm з нагоды прэм’еры.
Рэп-сэрыял працягне Вожык. Ён абяцае цягам сакавіка напісаць трэк, які будзе поўніцца абурэньнем, як на адрас Ангста, так і на адрас Башлыкевіча.
Яшчэ: Бард Башлыкевіч бязьлітасна пасьцябаўся з рэпэра Вожыка: «Твой верх — песьні пра с..аку»
Tuzin.fm