Рэліз дыска мае адбыцца 23 кастрычніка. На ім ня будзе аніводнай папярэдне выдадзенай кампазыцыі. «Шмат хто думаў, што мы памерлі. Але мы сьпяваем і танчым! Таму што рок-н-рол можа заглушыць нават гук пахавальных званоў, — вядзецца ў маніфэсьце з нагоды выхаду альбому. — Калі героі вядуць людзей на вайну — мы апранем маскі антыгерояў. Калі танцпляц завалены касьцямі — давайце на іх хоць патанчым! Калі рок-музыка — гэта мёртвая нявеста, чаму б не паціскаць нябожчыцу? Раптам прачнецца?»
Альбом гурта з Паўлам Булатнікавым на чале, будзе звацца «Magister Bibendi». Назва тлумачыцца так: «Magister Bibendi — гэта ня проста „распарадчык папойкі“, як лічаць знаўцы лацінскай. Гэта трыкстар, вулічны маг, абаяльны жулік, ды-джэй на піры падчас чумы. Ён прыходзіць у сьвет, калі той становіцца занадта сур’ёзным. Нам здаецца, што час ужо надыйшоў».
15 кастрычніка Trubetskoy апублікаваў тызэр на кліп на загалоўную песьню альбому. Сам кліп выйдзе 19 кастрычніка, а 23-га пабачыць сьвет аднайменны альбом. У лістападзе пачнецца тур у яго падтрымку. Расклад канцэртаў — у афіцыйных суполках гурту УК i FB.
Tuzin.fm, фота Tarantino